Шымкенттегі Бадам өзеніндегі бетон дамбаның 40 метрге жуық бөлігі зақымданған,-деп хабарлайды "Dalamedia" ақпараттық порталы Tengrinews.kz сайтына сілтеме жасап. Қоршаған ортаны дамыту басқармасы өкілдерінің айтуынша, белгісіз тұлғалар гидротехникалық құрылысты зақымдаған.

Қазіргі таңда құқық қорғау органдары бұзақыларды іздестіруде. Жауаптылардың сөзіне сенсек, өзендегі жағдай тұрақты, маңайдағы жерлерге су шығу қаупі жоқ.

Аталмыш жобаның құны 2,7 миллиард теңгені құраған. Былтыр желтоқсанда аяқталған жұмыс барысында Бадам өзенінің бойымен 5,3 шақырым жағалау нығайтылды.

Игілік, Жаңаталап және Көкбұлақ аудандарында өзен арнасы тегістеліп, бетондалған беткейлер күшейтілген. Гидротехникалық нысандарды бекіткен. Жаңа дамба көктемгі тасқыннан төнер қауіпті азайту мақсатында салынған.

Жеті жылдық кепілдік аясында зақымдалған учаскені мердігер ұйым өз қаржысына қалпына келтіреді.