Ақтөбе қаласында қайғылы жағдай болды. Жеке тұрғын үйлердің бірінен 1993 жылы туған әйел мен кәмелетке толмаған үш баланың мәйіті табылды.

Оқиға 2026 жылғы 9 ақпанда шамамен сағат 12:00-де Ақтөбе қаласының Алматы ауданында болды. Мамандар сөзінше, қайтыс болғандар газдан уланған. Аталған дерек бойынша сотқа дейінгі тергеп-тексеру басталды.

Сондай-ақ, қайғылы жағдайға байланысты арнайы комиссия құрылды. Оны Ақтөбе қаласының әкімі Азамат Бекет басқарады. Алдағы уақытта комиссия уәкілетті органдармен бірге тексеру жүргізіп, тергеу қорытындысына сәйкес шешім қабылдайды.

Сонымен қатар Ақтөбе қаласы Алматы ауданының әкімі Рүстем Өтешов жергілікті атқарушы органдар тарапынан марқұмдардың туған-туыстары мен жақындарына қажетті көмек көрсетілетінін мәлімдеді. Әкімдік жерлеу рәсімін ұйымдастыруға қолдау білдіріп, сондай-ақ материалдық және әлеуметтік көмек көрсетпек.

Қазіргі уақытта оқиғаның нақты себептері мен өзге де мән-жайлары анықталуда.