Енді әлеуметтік желіге жас шектеуі енгізілмек. Қазақстанда 16 жасқа толмаған балалардың әлеуметтік желілер мен онлайн-платформаларға тіркелуіне тыйым салуды көздейтін заң жобасы таныстырылды. Құжатты Мәдениет және ақпарат министрлігі әзірлеп, «Ашық НҚА» порталына жариялады.

Жаңа талапқа сай,енді 16 жасқа дейінгі балаларға видеохостингтерде, әлеуметтік желілерде және контент платформаларында аккаунт ашуға болмайды. Тек мессенджерлерге тіркелуге рұқсат етіледі.

Министрлік бұл шектеуді балаларды зиянды контенттен қорғау үшін қажет деп түсіндіреді. Ақпараттық қауіпсіздік сарапшысы Айгерім Сапарова да бастаманы құптайды:

«Жас шектеуі — балаларды киберқауіптен қорғаудың тиімді қадамы. Онлайн кеңістік олардың психологиясына әсер ететін көптеген тәуекелге толы», — дейді ол.

Заң Парламентте қабылданып, Президент қол қойған жағдайда ресми жарияланған күннен кейін 60 күн өткен соң күшіне енеді.