Президент Қасым-Жомарт Тоқаевқа Қорғаныс министрлігіндегі бюджет қаражатының жұмсалуына жүргізіліп жатқан жоспардан тыс аудиттің алғашқы нәтижелері баяндалды. Тексеру барысында бірқатар заң бұзушылық анықталып, 13 қылмыстық іс қозғалған, — деп хабарлайды «Dalamedia» ақпараттық порталы.

Мемлекет басшысы Жоғары аудиторлық палатаның төрағасы Әлихан Смайыловты қабылдап, Қорғаныс министрлігінің бюджет қаражатын қаншалықты тиімді пайдаланып отырғанын талқылады.

Ауқымды аудит 50 нысанды, оның ішінде 48 әскери бөлімді қамтиды. Тексеруге мемлекеттік аудит мамандарымен қатар IT және байланыс саласының сарапшылары тартылған. Аудит барысында әскери бөлімдердің материалдық-техникалық жағдайы, жеке құрамның даярлығы, оқу-жаттығулардың ұйымдастырылуы, әскери инфрақұрылымның дамуы, қару-жарақ пен техниканың жаңаруы және цифрлық жүйелердің жұмысы қаралады.

Сонымен бірге мемлекеттік қорғаныс тапсырысына жүргізілген аудиттің қорытындысы да Президентке таныстырылды. Заң бұзушылықтарды жою үшін Үкімет пен мемлекеттік органдарға 57 ұсыным мен тапсырма берілген.

Маңғыстау облысындағы әскери қызметшілердің қаза болуына байланысты жүргізілген тексеру барысында оқу-жаттығуларды дайындау мен жоспарлау кезінде бірқатар елеулі кемшілік болғаны анықталған. Атап айтқанда, тәуекелдерді бағалау, десант түсіруді ұйымдастыру және әскери қызметшілердің қауіпсіздігін қамтамасыз ету мәселелерінде олқылықтарға жол берілген.

Алдын ала тергеу әскери іс-шараларды жоспарлау кезінде қателіктер кеткенін және бұрынғы басшылық тарапынан тиісті бақылау болмағанын көрсеткен. Осы іске байланысты бес лауазымды тұлға қамауға алынған. Олардың әрекетіне тергеу аяқталғаннан кейін құқықтық баға берілмек.

Тексерудің алғашқы кезеңінде мемлекет мүлкін жымқыру, қызметтік өкілеттікті асыра пайдалану және Қорғаныс министрлігіне қарасты ұйымдардағы өзге де заң бұзушылықтар бойынша 13 қылмыстық іс қозғалды.

Бұдан бөлек, әскери тәртіпке қатысты да кемшіліктер анықталған. Әскери қызметшілерге әлімжеттік көрсету және жарғы талаптарына қайшы әрекеттер бойынша қылмыстық істер қозғалған.

Президент Қорғаныс министрлігінің жаңа басшылығымен бірлесіп, анықталған кемшіліктерді жою жөнінде нақты ұсыныстар әзірлеуді тапсырды. Тексеру қорытындылары Қарулы күштерді реформалау жоспарын дайындау кезінде ескерілуі тиіс.

Мемлекет басшысы аудитті жалғастыруды және мемлекеттік аудит жүйесін жетілдіруге қатысты нақты тапсырмалар берді. Сонымен қатар Қарулы күштерде әскери тәртіпті күшейтіп, қызметшілердің қауіпсіздігін қамтамасыз етуге және әскери қызмет өткеруіне тиісті жағдай жасауға баса мән беруді тапсырды.

Еске салайық, бұған дейін Қасым-Жомарт Тоқаев Қорғаныс министрлігіндегі үш жоғары лауазымды қызметкерді қызметінен босатқан болатын.