Өзбекстанда 14 жастағы жасөспірімнің анасы мен өгей әкесі оны 45 мың долларға, яғни шамамен 22,5 миллион теңгеге сатпақ болған. Сотта жасөспірім ата-анасына ешқандай өкпесі жоқ екенін айтып, оларға жеңілдік жасауды сұраған, — деп хабарлайды «Dalamedia» ақпараттық порталы Daryo басылымына сілтеме жасап.

Оқиға Қашқадария облысында болған. Іс материалдарына сәйкес, әйел бұрынғы некесінен 2011 жылы туған ұлын тәрбиелеп келген. 2019 жылы қайта тұрмысқа шыққаннан кейін отбасында тағы бір бала дүниеге келген.

Сотта ерлі-зайыптылардың қаржылық қиындыққа тап болып, қарызға батқанын айтқаны белгілі болды. Олардың сөзінше, осы жағдай үлкен ұлын сатуға итермелеген.

«Ақша табудың кез келген жолын іздедік. Ақыры қарыздарымызды өтеу үшін үлкен ұлымызды сатуға шешім қабылдадық. Кейін бұл туралы танысымның біріне айттым», — деді баланың анасы.

Кейін ерлі-зайыптылар таныстары арқылы баланы сатып алуға келіскен адамды тапқан. 2025 жылдың жазында ата-анасы 14 жастағы ұлымен бірге сол адаммен кездесуге барған.

Кездесуде жасөспірімнің құны 45 мың доллар деп белгіленген. Келісім бойынша ата-анасы алдымен 30 мың доллар алуы керек болған. Қалған 15 мың долларды сатып алушы 15 күннен кейін беруге уәде еткен.

Алайда келісім жүзеге аспай қалған. Кездесу кезінде бөлмеге құқық қорғау органдарының қызметкерлері кіріп, жасөспірімнің анасы мен өгей әкесін ұстаған. Олардың қолындағы ақша алдын ала арнайы химиялық затпен өңделген болып шыққан.

Сот барысында өгей әкесі кінәсін мойындаған. Оның айтуынша, баланы сату туралы ұсынысты алғаш болып әйелі айтқан.

Баланың анасы да бұл сөзді растаған. Екеуі де өз әрекеттерін қаржылық қиындықпен және қарыздарын өтеу қажеттілігімен түсіндірген.

Сотта 14 жастағы жасөспірімнің жауабы да назар аудартты. Оның айтуынша, анасы мен өгей әкесі оны басқа отбасына бермек болғанын алдын ала айтқан. Бала олардың шешіміне қарсылық білдірмегенін және ата-анасының мұндай қадамға қаржылық қиындықтан барғанын түсінетінін жеткізген.

Жасөспірім анасы мен өгей әкесіне ешқандай шағымы жоқ екенін айтып, соттан оларға жеңілдік жасауды сұраған.

Алайда оның өтінішіне қарамастан, сот ерлі-зайыптылардың екеуін де адам саудасына қатысты кінәлі деп таныды. Анасы мен өгей әкесінің әрқайсысы үш жылға бас бостандығынан айырылды.

Айта кетейік, бұған дейін ерлі-зайыптылардың несие қарызын өтеу үшін туған сәбиін сатпақ болғаны туралы хабарланған еді.