Қазақстанда үй жануарларын асырушылардың жауапкершілігі артпақ.Жануарын асырай алмайтын азамат оған жаңа қожайын табуы керек. Немесе арнайы баспанаға орналастыруы қажет. Бұл талаптарды орындамаған азаматтарға 30 айлық есептік көрсеткіш, яғни шамамен 130 мың теңге көлемінде айыппұл салынуы мүмкін, - деп хабарлайды «Dalamedia» ақпараттық порталы КТК телеарнасына сілтеме жасап.

Жаңа тәртіп бойынша, үй жануарынан бас тартқан иесі оны көшеге тастай алмайды. Жаңа қожайын табылғанша немесе арнайы баспанаға орналастырылғанға дейін оның қауіпсіздігіне бұрынғы иесі жауапты болады.

Талаптың орындалуын бақылау үшін үй жануарларын микрочиптеу жүйесі қолданылады. Арнайы чип арқылы оның иесін анықтауға мүмкіндік бар. Осылайша, көшеге тастап кеткен үй жануарының иесін тауып, оны заңға сәйкес жауапкершілікке тартуға болады.

Астанадағы баспаналардың бірінде қазір 200-ден астам ит пен мысық бар. Мамандардың айтуынша, олардың барлығы көшеден әкелінген. Тұрғындар асырандысын көбіне қоқыс жәшіктерінің маңына, дәмхана немесе қала сыртына тастап кетеді.

Экология және табиғи ресурстар министрлігінің Жабайы табиғат және аңшылық департаментінің бас сарапшысы Олжабек Холовтың айтуынша, бұрынғы талаптарда иесі өз үйіндегі асырандысына қарай алмаған жағдайда тиісті шара қабылдауы керек болған.

Енді жаңа тәртіпте оны басқа адамға беру немесе арнайы баспанаға орналастыру міндеті нақты көрсетілген. Бұл қараусыз қалған үй жануарларының санын азайтып, оларды асырайтын азаматтардың жауапкершілігін арттыруға бағытталған.