Украина АҚШ тарапының өтінішінен кейін Ресейдің Новороссийск портын пайдаланатын және Қазақстан мұнайын тасымалдайтын танкерлерге дрондармен шабуыл жасауды тоқтатқан. Бұл туралы бұған дейін айтылған мәліметтерге сүйенген БАҚ хабарлады, — деп хабарлайды «Dalamedia» ақпараттық порталы.

Басылымның жазуынша, АҚШ вице-президенті Джей Ди Вэнс өткен айда Украина тарабына мұндай өтініш жасаған. Вашингтон Украина әскерінің шабуылдары мұнай нарығындағы тұрақтылыққа әсер етіп, америкалық компаниялардың мүддесіне зиян келтіріп жатқанын алға тартқан.

Мәселе Қазақстаннан Каспий құбыр консорциумының Новороссийскідегі терминалына құбыр арқылы жеткізілетін мұнайды тасымалдайтын танкерлерге жасалған шабуылдарға қатысты. АҚШ әкімшілігі КҚК бағытын Қазақстанның энергетикалық ресурстарын Еуропа нарығына жеткізетін маңызды арна әрі Ресейдің энергия жеткізіліміне балама бағыт ретінде қарастырады.

Бұл бағытта америкалық компаниялардың да мүддесі бар. Chevron және ExxonMobil КҚК-дағы үлестерге ие. Сонымен қатар олар осы бағытты пайдаланатын Қазақстандағы мұнай кен орындарын игеруге қатысады.

Ақпаратқа сәйкес, Украина Ресейге қатысы жоқ кемелерге шабуыл жасамауға келіскен. Алайда мұндай кемелер Украина санкцияларына енбеген және ресейлік мұнай мен өзге де ресейлік жүктерді тасымалдамауы тиіс.

Соңғы уақытта Украина күштері Ресейдің энергетикалық инфрақұрылымы мен басқа да нысандарына соққы беруді күшейткен. Киев мұндай әрекеттердің мақсаты Ресейдің әскери операцияларын қаржыландыруға бағытталған ресурстарын азайту екенін мәлімдеген.

Төрт дереккөздің мәліметінше, шілдеде Қара теңіздегі дрон шабуылдары КҚК арқылы жөнелтілетін мұнай көлемінің бестен бір бөлігіне дейін әсер еткен. Бұл жағдай Қазақстан мен Батыстың ірі мұнай компанияларының мұнай өткізуіне де кері ықпал еткен.

Қазақстан мұнай экспортының негізгі бөлігін КҚК бағыты арқылы жүзеге асырады. Дереккөздер шілдеде елдегі мұнай өндіру көлемі маусым айымен салыстырғанда 14 пайызға азайғанын айтқан.

Бұған дейін, 23 шілдеде КҚК теңіз терминалында мұнай тиеу жұмыстары уақытша тоқтаған болатын. Соның салдарынан мұнай өндіру көлемі төмендеген. Ал 27 шілдеде консорциум мұнай қабылдауды қайта бастағаны хабарланды.