Жатақханадағы орындарды бөлу кезінде әлеуметтік санаттарға жататын студенттерге басымдық беріледі. Бұл туралы Ғылым және жоғары білім министрлігінің өкілі Ақерке Абылайхан айтты, — деп хабарлайды «Dalamedia» ақпараттық порталы.

Оның айтуынша, ең алдымен жетім және ата-анасының қамқорлығынсыз қалған балаларға, I, II және III топтағы мүгедектігі бар азаматтарға, ауыл квотасы бойынша грант иеленгендерге, қандастарға және аз қамтылған отбасылардан шыққан студенттерге орын беріледі.

Сондай-ақ «Серпін» жобасы бойынша білім алған жастар да жатақханаға орналасу кезінде басымдыққа ие болады.

Министрлік өкілі жоғарғы курс студенттеріне қатысты да түсініктеме берді. Егер университет жанындағы жатақханаларда орын жетіспесе, жоғары оқу орындары жекеменшік жатақханалармен келісімшарт жасап, студенттерге сол нысандардан орын ұсынуға тиіс.

Бұл туралы Ақерке Абылайхан Орталық коммуникациялар қызметінде өткен брифингте мәлімдеді.