Павлодарда 24 жастағы әйел жаңа туған қызын 800 мың теңгеге сатуға әрекет жасаған. Ол баланы дүниеге әкелгеннен кейін медициналық құжаттарымен бірге сатып алушыға беріп, 100 мың теңге алған, — деп хабарлайды «Dalamedia» ақпараттық порталы.

Сот мәліметінше, Түркістан қаласының тұрғыны қаржылық қиындықтарға байланысты жүктілік кезінде дүниеге әлі келмеген сәбиін ақшаға сатуды жоспарлаған. Осы мақсатта ол «ВКонтакте» әлеуметтік желісіндегі бала асырап алуға ниетті адамдар жиналған қауымдастыққа хабарландыру жариялаған.

Кейін әйел баланы 800 мың теңгеге сатуға келісетін сатып алушы тапқан.

28 наурызда ол Павлодар облыстық №1 перинаталдық орталығында дені сау қыз баланы дүниеге әкелген. Үш күннен кейін, 31 наурызда, Павлодар қаласындағы пәтерлердің бірінде прокуратура қызметкерлері жүргізген жедел-іздестіру шаралары мен жасырын тергеу әрекеттері барысында оның әрекеті әшкереленді.

Әйел жаңа туған нәрестені медициналық құжаттарымен бірге сатып алушыға беріп, 100 мың теңге көлемінде ақша алған.

Сот оны баланы сатуға әрекет жасағаны үшін кінәлі деп танып, 5 жылға бас бостандығынан айырды. Алайда жазасын өтеу мерзімі 5 жылға кейінге қалдырылды.

Прокуратура балаларды заңсыз сатқаны үшін заңда қатаң жауапкершілік қарастырылғанын ескертті.