Қазақстанда сырттан әкелінетін автокөліктердің бағасы шамамен 15 пайызға өсуі мүмкін. Бұған кедендік рәсімдеу кезінде төленетін алым көлемінің 33,4 пайыздан 48 пайызға дейін артуы мүмкін деген болжам себеп болып отыр, - деп хабарлайды «Dalamedia» ақпараттық порталы.

Алайда бұл ақпарат әзірге ресми түрде расталған жоқ. Мемлекеттік кірістер комитеті жеке тұлғалардың Қазақстанға автокөлік әкелуіне қатысты қандай да бір шектеу енгізілгенін жоққа шығарған. Қазіргі қолданыстағы тәртіп бойынша жеңіл автокөліктердің басым бөлігіне кедендік баж мөлшерлемесі 15 пайыз деңгейінде сақталған.

Сонымен қатар 2026 жылы электромобильдер мен тізбекті гибридтер үшін импорттық кедендік баж мөлшерлемесі нөл пайыз болып белгіленген.

Автосарапшылардың пікірінше, егер кедендік төлемдер артса, шетелден көлік әкелуге кететін шығын да көбейеді. Бұл өз кезегінде автокөлік бағасына әсер етуі мүмкін. Сондай-ақ мұндай өзгеріс экологиялық таза көліктердің халыққа қолжетімділігін төмендетуі ықтимал.

Осыған байланысты бастамашыл топ мәселені қоғамдық талқылауға шығаруды ұсынып отыр.

«Көлік нарығына қатысты өзгерістер қызу талқыланып жатыр. Егер кедендік төлем көлемі өссе, шетелден көлік әкелу қиындап, оның салмағы қарапайым халықтың қалтасына түседі. Яғни темір тұлпардың бағасы да қымбаттауы мүмкін. Сондықтан төлемді көтермеуді ұсынып отырмыз. Сондай-ақ экологиялық таза көліктердің көбеюі қоршаған ортаның жақсаруына да оң әсер етеді», – деді автосарапшы Данияр Күзембаев.