41 жастағы португалиялық футболшы Криштиану Роналду мен модель Джорджина Родригес ресми түрде некеге тұрды. Футболшы Instagram парақшасында неке жүзіктерін көрсетіп түскен фотосын жариялады, - деп хабарлайды «Dalamedia» ақпараттық порталы.

Батыс бұқаралық ақпарат құралдарының мәліметінше, жұптың өкілі олардың некеге тұрғанын растаған. Азаматтық неке қию рәсімі Португалияның Кашкайш қаласында жақын туыстары мен отбасы мүшелерінің қатысуымен өткен.

Роналду мен Родригес 2016 жылы Мадридте танысқан. Ол кезде Джорджина Gucci дүкендерінің бірінде сатушы болып жұмыс істеген. Жұп ретінде олар алғаш рет 2017 жылғы 9 қаңтарда көпшілік алдына шыққан.

2025 жылдың тамызында Джорджина Родригес Роналдумен танысқанына тоғыз жыл өткен соң, олардың ресми түрде некеге тұратынын жариялаған.

Қазір ерлі-зайыпты бес бала тәрбиелеп отыр. Олардың екеуі Джорджинаның Роналдумен бірге дүниеге келген балалары болса, үшеуі суррогат ана арқылы туған.

Криштиану Роналду 2023 жылдан бері Сауд Арабиясының «Ан-Наср» клубында ойнайды. Ол мансабының басым бөлігін 2009–2018 жылдары «Реал Мадрид» сапында өткізді. Командамен бірге Испания чемпионатын екі рет, ел кубогын екі рет және Чемпиондар лигасын төрт рет жеңіп алған.

Сондай-ақ Роналду «Спортинг», «Манчестер Юнайтед» және «Ювентус» клубтарында өнер көрсеткен. Ол «Алтын доп» жүлдесін бес рет иеленген.