Түркістан облысында әкімшілік құқық бұзушылықты фото немесе видеоға түсіріп, оны анықтауға көмектескен азаматтарға 43 250 теңгеге дейін сыйақы беріледі, -деп хабарлайды «Dalamedia» ақпараттық порталы.

Жаңа тәртіпке сәйкес, әрбір жіберілген видео үшін бірден ақша төленбейді. Алдымен құқықбұзушылық дерегі расталып, оның бұған дейін автоматты камералар, полиция қызметкерлері немесе басқа азаматтар тарапынан тіркелмегені анықталуы керек.

Сондай-ақ әкімшілік іс бойынша шығарылған қаулы заңды күшіне еніп, құқық бұзған адам айыппұлын толық төлеуі тиіс. Осы талаптар орындалғаннан кейін ғана материал арнайы комиссияның қарауына жіберіледі.

Сыйақының ең жоғары мөлшері – 10 АЕК, яғни 2026 жылы 43 250 теңге. Нақты төлем көлемін комиссия азаматтың құқықбұзушылықты анықтауға қосқан үлесіне қарай белгілейді.

Сыйақы алғысы келген азамат «Е-Өтініш» жүйесі, «102» мобильді қосымшасы немесе полицияның кезекші бөлімі арқылы хабарлай алады. Өтініште ЖСН, жеке куәлік деректері, мекенжайы және банк шоты көрсетілуі қажет.

Өтініштерді аудан және облыстық маңызы бар қала әкімдіктері жанынан құрылған комиссия қарайды. Құжат 15 жұмыс күні ішінде қаралады. Қажет болған жағдайда бұл мерзім тағы 10 жұмыс күніне ұзартылуы мүмкін.

Сыйақы тағайындалған жағдайда ақша азаматтың банк шотына 30 күнтізбелік күннен кешіктірілмей аударылады. Алайда төлем жергілікті бюджетте осы мақсатқа қаражат болған кезде ғана беріледі.

Бұдан бөлек, құқықбұзушылықтың алдын алуға немесе оны анықтауға көмектескен азаматтарға алғыс жариялау, құрмет грамотасын беру, оқуға жіберу немесе жұмыс орны бойынша марапаттау қарастырылған. Кей жағдайда олар мемлекеттік наградаға немесе құрметті атаққа ұсынылуы мүмкін.