Түркістан облысында той үстінде діни мазмұнда сөз сөйлеген 66 жастағы тұрғынға қатысты қылмыстық іс қозғалды. Әлеуметтік желіде тараған видеодан кейін полиция тексеру жүргізіп, ер адамның сөздерінен діни және әлеуметтік алауыздықты қоздыру белгілерін анықтаған, — деп хабарлайды «Dalamedia» ақпараттық порталы.

Ішкі істер министрлігі қоғамдық келісімге нұқсан келтіретін, адамдарды кемсітуге немесе олардың ар-намысы мен қадір-қасиетін қорлауға бағытталған кез келген үндеулерге заң аясында баға берілетінін мәлімдеді.

Министрлік өкілдерінің айтуынша, сөз бостандығы заң талаптарын сақтауға міндетті. Қоғамдық ортада айтылған және құқық бұзушылық белгілері бар кез келген мәлімдеме мұқият тексеріледі.

Қазір қылмыстық істің нақты баптары мен тергеу барысына қатысты өзге мәліметтер жарияланған жоқ. Тергеу қорытындысы бойынша ер адамның әрекетіне түпкілікті құқықтық баға беріледі.

Бұған дейін әлеуметтік желіде тараған видеода ер адамның той кезінде құттықтау айтудың орнына уағыз айтып, ерлер мен әйелдердің бірге отыруына қарсы пікір білдіргені талқыланған еді. Ол тойларда арақтың қойылмауын оң өзгеріс деп бағалап, енді музыканы алып тастау және әйелдер мен ерлерді бөлек отырғызу қажет деген ұсыныс айтқан.

Сонымен қатар, қария тойға келген әншілерді сынап, ал әйелдерге қатысты қолданған сөзі үшін көпшіліктің наразылығына тап болды. Желі қолданушылары тойдың негізгі мәні — адамдарға ақыл айту емес, қуаныш бөлісу мен ізгі тілек білдіру екенін атап өтті.