Қырғызстан мен Өзбекстан шекара маңындағы аумақтарды қайта бөлу бойынша ұйымдастырушылық-техникалық жұмыстарды бастады. Атап айтқанда, Өзбекстанның Бұхара облысына қарасты болған Чоң-Қара және Таш-Төбе ауылдарын Қырғызстанға беру рәсімі жүргізілуде деп хабарлайды даламедиа ақпараттық порталы

Жұмыстар екі ел арасындағы мемлекеттік шекараны демаркациялау және жер учаскелерімен алмасу жөніндегі келісімдер аясында жүзеге асырылып жатыр.24 шілдеде Қадамжай ауданында Қырғызстан мен Өзбекстанның бірлескен жұмыс комиссиясының алғашқы отырысы өтті. Кездесуде аумақ тұрғындарының азаматтық мәртебесі, көшіру мәселелері, мүлік пен шаруашылық қызметке қатысты сұрақтар және басқа да ұйымдастырушылық жұмыстар талқыланды.

3 тамыздан бастап арнайы жұмыс тобы ауылдарда тікелей жұмысын бастады. Мамандар тұрғындарды тіркеуден өткізіп, құжаттарды рәсімдеу тәртібін түсіндіруде.

Чоң-Қара және Таш-Төбе ауылдарында негізінен этникалық қырғыздар тұрады. Алдын ала мәлімет бойынша, екі елді мекеннің тұрғындары шамамен 2,5 мың адамды құрайды. Тіркеу аяқталғаннан кейін азаматтарға Қырғызстан азаматтығын беру рәсімі басталады.

Өз кезегінде Қырғызстан Өзбекстанға жалпы аумағы 236 гектар болатын тең құнды жер учаскелерін береді. Бұл аумақ Сай — Таян автожолын салуға пайдаланылмақ.

Сонымен қатар Қырғызстан Тәжікстанмен де аумақ алмасу мәселесін қарастырып жатыр. Бұған дейін Қырғызстан президентінің баспасөз хатшысы Қазақстанмен де тең құнды жер учаскелерімен алмасу мүмкіндігі бар екенін айтқан еді.