Каспий құбыр консорциумы қазақстандық мұнайды қабылдау мен экспорттау жұмысын қайта іске қосты. Қазір Новороссийск теңіз терминалында екі танкерге мұнай тиеліп жатыр, — деп хабарлайды «Dalamedia» ақпараттық порталы.

Энергетика министрлігінің мәліметінше, теңіз терминалының екі айлағында SEAMAJESTY және MILOS танкерлеріне мұнай тиеу жүріп жатыр. Екі кеме де «Теңізшевройл» ЖШС өндірген мұнайды қабылдауда.

Ведомствоның хабарлауынша, терминал жұмысының қайта жандануы мұнай өндіруші компанияларға шикізатты құбыр жүйесіне қайта жеткізіп, экспортты қалыпты тәртіппен жалғастыруға мүмкіндік береді.

Министрлік барлық жұмыс қолданыстағы жағдай мен қауіпсіздік талаптарын ескере отырып жүргізіліп жатқанын мәлімдеді. Сондай-ақ ведомство Каспий құбыр консорциумы басшылығымен, ірі мұнай жөнелтушілермен және өзге де қатысушылармен тұрақты байланыста екенін жеткізді.

Қазір Энергетика министрлігі жағдайды бақылауда ұстап, қазақстандық мұнайдың үздіксіз экспортталуын қамтамасыз ету үшін барлық жұмысты үйлестіріп отыр.

Еске сала кетейік, бұған дейін Новороссийск маңындағы теңіз терминалына жасалған бірнеше дрон шабуылынан кейін Каспий құбыр консорциумы қазақстандық мұнайды қабылдауды уақытша тоқтатқан болатын. Оған қауіпсіздікке қатысты тәуекелдердің күшеюі және танкер иелерінің алаңдаушылығы себеп болған еді.