Алматы тұрғыны Анель Сидағұлова ұлының «Жаңа Ұрпақ» балалар лагерінде болғаннан кейін психологиялық күйі өзгеріп, лагерьге барудан мүлде бас тартқанын айтты. Оның сөзінше, бала лагерьде буллингке ұшырап, тұрмыстық және санитарлық жағдайдың да көңіл көншітпегенін жеткізген, — деп хабарлайды «Dalamedia» ақпараттық порталы.

Анель Сидағұлованың айтуынша, оқиға 2024 жылдың қараша айында болған. Алайда баласы сол кезде ештеңе айтпаған. Тек араға уақыт салып, биыл лагерь туралы сөз қозғалғанда көзіне жас алып, өзінен үлкен балалардың бірнеше рет ұрып-соққанын айтып берген.

Анасының айтуынша, лагерьді ұзақ іздеп, жақсы пікірлерге сеніп таңдаған. Себебі ұлының жаңа ортада дамып, жақсы әсер алғанын қалаған.

Ол лагерьге дейін баласының ашық мінезді, сабырлы болғанын, шахматпен, жүзумен және фортепианомен айналысатынын айтты. Сондықтан ұйымдастырушылардан қауіпсіздік мәселесін алдын ала сұрағанын да жасырмады.

Анель Сидағұлованың сөзінше, баласын лагерьден алып кеткен кезде оның көңіл күйі түсіп тұрған. Киімдері кір болып, кейбір жеке заттары жоғалған. Сонымен қатар дәретхананың сыртта орналасқаны және қол жууға жағдай жасалмағаны баласына ауыр тиген.

Кейін бала лагерьге қайта барудан үзілді-кесілді бас тартып, тіпті күндізгі лагерь туралы айтылғанның өзінде жылайтын болған. Анасы мұның бәрі сол жерде болған оқиғамен байланысты екенін айтады.

Оның айтуынша, лагерьдегі тамақтануға қатысты да мәселе болған. Баласының сөзінше, балаларға берілетін ас жеткіліксіз болған, ал кейбір заттары жоғалғанымен, оларды іздеуге ешкім көмектеспеген.

Анель Сидағұлова былтыр лагерь әкімшілігіне шағымданғанын, алайда жауап алмағанын жеткізді. Сондықтан биыл баласының жағдайын қайта естіген соң бұл туралы көпшілікке жариялауды жөн көрген.

Ол қазіргі таңда ұлын өзін қорғай алуы үшін каратэ үйірмесіне бергенін айтып, мұндай жағдайдың басқа балалардың басына түспеуін қалайтынын жеткізді.

Желіде жарияланған жазбадан кейін «Жаңа Ұрпақ» лагерінің әкімшілігі ішкі тексеру басталғанын хабарлады.

Лагерь өкілдерінің мәліметінше, ата-ананың былтырғы шағымында жоғалған заттар, тұрмыстық жағдай мен тамақтануға қатысты мәселелер ғана көтерілген. Ал буллинг немесе күш қолдану жөнінде ақпарат болмаған.

Әкімшілік Анель Сидағұлованың ұлы бұл жағдайды анасына жақында ғана айтқанын мәлімдеп, соған қарамастан оқиғаға қатысты тексеру жүргізіліп жатқанын хабарлады.

Лагерьдің негізін қалаушы Асхат Әбжанов ата-анамен жеке кездесіп, оқиғаның мән-жайын талқылаған. Қазіргі уақытта сол ауысымда жұмыс істеген тәлімгерлермен сөйлесіп, барлық жағдай қайта зерделеніп жатыр.

Лагерь өкілдерінің айтуынша, әзірге буллинг болғанын нақты растайтын дәлел жоқ. Дегенмен тексеру жалғасып жатыр және бұл мәселе бақылаудан алынбаған.

Әкімшілік барлық даулы мәселені жария айыптаулар арқылы емес, ашық диалог арқылы шешуге мүдделі екенін атап өтті. Сондай-ақ балалардың қауіпсіздігі өздері үшін басты құндылық екенін мәлімдеді.