Астанада әлеуметтік желіде әскерде зорлық-зомбылық көргенін айтып, халықтан қаржылай көмек сұраған 23 жастағы азамат сот үкімімен үш жылға бас бостандығынан айырылды, — деп хабарлайды «Dalamedia» ақпараттық порталы.

Тергеу мәліметіне сәйкес, ер адам биыл ақпан айында интернетте анонимді жазба жариялаған. Ол әскери қызмет кезінде өзіне зорлық көрсетілгенін айтып, өміріне қауіп төніп тұрғанын жазған және шетелге шығу үшін ақша қажет екенін көрсеткен. Сондай-ақ жазбасында қаржы аударуға арналған банк шотын қоса қалдырған.

Алайда жүргізілген тексеру барысында бұл ақпараттың шындыққа жанаспайтыны анықталды. Азаматтың ешқашан әскери қызметте болмағаны белгілі болды. Ақша жинау үшін ол 17 жастағы танысының банк шотын пайдаланған. Танысы бұл жағдайдан хабарсыз болған.

Екі күн ішінде аталған есепшотқа 15-тен астам ақша аударымы түскен. Тергеу барысында күдікті жалған ақпаратты тек қаржы табу мақсатында таратқанын мойындаған.

Оған қатысты алаяқтық және көрінеу жалған ақпарат тарату баптары бойынша қылмыстық іс қозғалды. Сот оны кінәлі деп танып, үш жылға бас бостандығынан айыру туралы шешім шығарды.

Полиция азаматтарға әлеуметтік желідегі ақпаратты тексермей қабылдамауға және бейтаныс адамдардың өтінішімен ақша аудармауға кеңес береді.