Қазақстанның 16 миллион азаматына қатысты жеке деректер жабық интернет кеңістігі – Darknet арқылы сатылған болуы ықтимал. Бұл туралы Жасанды интеллект және цифрлық даму вице-министрі Досжан Мұсалиев мәлімдеді, — деп хабарлайды «Dalamedia» ақпараттық порталы.

Вице-министрдің айтуынша, аталған деректер базасы бір күнде қалыптаспаған. Оның болжамынша, мәліметтер бірнеше жыл, тіпті ондаған жыл бойы әртүрлі көздерден жиналған. Мұндай ауқымды база кейін Darknet арқылы сатылып, оны коллекторлық агенттіктердің бірі сатып алған болуы мүмкін.

Биыл маусым айында Жетісу облысында 16 миллионға жуық қазақстандықтың жеке деректері сақталған база тәркіленген болатын. Тергеу мәліметіне сәйкес, коллекторлық агенттік қызметкерлері азаматтардың жеке сәйкестендіру нөмірін, телефон нөмірлері мен тұрғылықты мекенжайлары туралы мәліметтерді заңсыз пайдаланған. Қазір бұл іс бойынша Ішкі істер министрлігі, прокуратура және Ұлттық қауіпсіздік комитеті тергеу жүргізіп жатыр.

Еске салсақ, 2025 жылдың жазында да шамамен 16 миллион қазақстандықтың жеке деректері интернетке тараған еді. Сол кезде министрлік бұған хакерлік шабуыл емес, деректерге заңды түрде қол жеткізе алатын тұлғалардың оларды заңсыз пайдалануы себеп болуы мүмкін екенін хабарлаған. Кейін жүргізілген тексеріс барысында мәліметтердің басым бөлігі 2022 жылы-ақ сыртқа шыққаны анықталған.

Ал биыл сәуір айында Қазақстанда азаматтардың жеке деректерін заңсыз жинау және сату дерегі бойынша қылмыстық іс тергеліп жатқаны белгілі болды.