АҚШ президенті Дональд Трамп 2026 жылғы футболдан әлем чемпионатының финалдық матчы өткен стадионнан шыққаннан кейін бірнеше секунд өткен соң Иранға соққы жасауға бұйрық берді, — деп хабарлайды «Dalamedia» ақпараттық порталы.

АҚШ Орталық қолбасшылығының (CENTCOM) мәліметінше, Иранға бағытталған тоғызыншы әуе соққысы Шығыс уақытымен кешкі сағат 19:00-де басталған.

«Бүгін кешкі сағат 19:00-де қатарынан тоғызыншы түн Иранға қарсы жаңа соққы толқыны басталды. Шабуылдар Иранның Ормуз бұғазы арқылы өтетін коммерциялық кемелер мен азаматтық теңіз қатынасына қауіп төндіруге пайдаланылатын әскери әлеуетін әлсіретуге бағытталған», – делінген ресми хабарламада.

Осыған байланысты АҚШ-тың Бахрейн астанасы Манамадағы елшілігі елдегі барлық Америка азаматтарына сақтық танытып, жергілікті биліктің талаптарын қатаң орындауға кеңес берді.

Сондай-ақ АҚШ Орталық қолбасшылығы бұған дейін із-түзсіз жоғалған үшінші америкалық әскери қызметшінің сүйегі табылғанын мәлімдеді. Алайда оның кім екені әзірге анықталған жоқ.

Ал Иранның Tasnim ақпарат агенттігінің мәліметінше, жарылыстар Табриз, Чабахар, Канарак және Бандар Имам Хомейни қалаларында естілген. Басылым соққылардың нақты қай нысандарға жасалғанын жарияламады.

Аталған төрт қала Иран үшін стратегиялық, экономикалық және көлік тұрғысынан маңызды аймақтардың қатарына жатады.