Алматыдағы супермаркеттердің бірінде өлшеніп сатылатын кәмпиттердің арасынан бірнеше тарақан табылды. Тұрғын бұл жағдайды әлеуметтік желіде жариялап, видео таратқан, — деп хабарлайды «Dalamedia» ақпараттық порталы.
Оқиға Розыбакиев көшесі маңындағы көтерме сауда базарының жанында орналасқан Toimart супермаркетінде болған. Алматы тұрғыны Адель Threads желісінде жариялаған кадрларда кәмпиттердің арасында жүрген жәндіктер көрінеді.
«Масқара, бір емес, бірнешеуі кәмпиттердің арасында жүр», – деп жазған ол.
Жарияланымнан кейін Toimart желісінің бас директоры Дастан Молдаханов пікір білдірді. Ол мұндай жағдайға жол берілмейтінін айтып, тексеру жүргізілетінін жеткізді.
«Ертең барлық кәмпиттер жойылады, сату орны өңделіп, дезинфекция жасалады. Бұл жағдайдың қалай болғанын анықтаймыз», – деді ол.
Сондай-ақ компанияның ресми өкілдері де тұрғынға жауап беріп, мәселені шешу бойынша жұмыстар басталғанын хабарлады. Тараптар жағдайдың себептері анықталатынын мәлімдеді.
DALAMEDIA admin
4
0