Қазақстанда мұрағат ісі және ветеринария саласында еңбек ететін мамандарға жаңа қосымша төлемдер қарастырылды. Сонымен қатар ауылдық жерде жұмыс істейтін қызметкерлерге де үстемақы белгілеу мүмкіндігі артты, — деп хабарлайды «Dalamedia» ақпараттық порталы.

Үкіметтің №564 қаулысына сәйкес, жаңа нормалар 2026 жылғы 30 маусымнан бастап күшіне енді. Құжатта еңбек жағдайына байланысты төленетін қосымша төлемдерге қатысты өзгерістер енгізілген.

Енді ветеринария және мұрағат саласының мамандары заңнамада белгіленген тәртіппен тиісті үстемақылар алуға құқылы.

Сондай-ақ ауылдық елді мекендерде еңбек ететін мамандарды қолдау шаралары күшейтіледі. Жергілікті мәслихаттардың шешімі негізінде олардың лауазымдық жалақысына кемінде 25 пайыз көлемінде қосымша төлем белгіленуі мүмкін.

Қаулыда алдағы кезеңге арналған өзгерістер де қарастырылған. Атап айтқанда, 2027 жылғы 1 қаңтардан бастап мемлекеттік қызметшілердің еңбекақысына қосымша арттыру коэффициенті енгізіледі. Соның нәтижесінде олардың лауазымдық жалақысы 1,75 есеге дейін өседі.