Қазақстан бензин, дизель отыны және өзге де мұнай өнімдерін ел аумағынан шығаруға енгізілген шектеуді тағы алты айға ұзартуды жоспарлап отыр, — деп хабарлайды «Dalamedia» ақпараттық порталы.

Энергетика министрлігі тиісті бұйрық жобасын әзірледі. Құжатқа сәйкес, экспортқа қойылған тыйым 2026 жылғы 22 қарашадан бастап 2027 жылғы 22 мамырға дейін күшінде болады.

Шектеу Еуразиялық экономикалық одаққа мүше мемлекеттерге жіберілетін мұнай өнімдеріне де қатысты болады. Сонымен қатар 2027 жылғы 1 қаңтар мен 30 маусым аралығында ЕАЭО аумағынан тыс елдерге жеңіл дистилляттар, авиациялық керосин, дизель отыны, газойль, толуол, ксилол және мұнай битумын шығаруға тыйым салу көзделген.

Алайда құжатта бірқатар ерекшелік қарастырылған. Атап айтқанда, гуманитарлық көмек ретінде жеткізілетін мұнай өнімдеріне және Қазақстан Үкіметінің арнайы шешімімен жүзеге асырылатын экспортқа бұл шектеулер қолданылмайды.

Энергетика министрлігі бұл шаралар елдің энергетикалық қауіпсіздігін қамтамасыз етуге және ішкі нарықты жанар-жағармай өнімдерімен тұрақты қамтуға бағытталғанын атап өтті.

Бұйрық жобасы 21 шілдеге дейін қоғамдық талқылауда болады. Осы уақыт аралығында азаматтар өз ұсыныстары мен ескертулерін жолдай алады.

Бұған дейін Қазақстаннан көрші мемлекеттерге жанар-жағармай өнімдерін заңсыз тасымалдау жағдайларының көбеюіне байланысты шетелдік ірі жүк көліктері мен жеңіл автокөліктердің ел аумағына кіруіне шектеу енгізілген болатын.