Блогерлер Ерболат Жанәбілов пен Эльмира Төлегеновадан тәркіленген сегіз автокөлік мемлекеттік органдардың пайдалануына беріледі, — деп хабарлайды «Dalamedia» ақпараттық порталы.
7 шілдеде тәркіленген көліктер бойынша аукцион өткен. Саудаға шығарылған сегіз көлік те 2025 жылғы Hyundai Elantra маркалы автокөліктер. Олар блогерлерге тиесілі ZHANA BUSINESS LLC компаниясының атына тіркелген.
Онлайн аукционға тек құқық қорғау және арнайы мемлекеттік органдар, сондай-ақ Президенттің, саяси мемлекеттік қызметшілердің және Парламент депутаттарының қызметін қамтамасыз ететін мемлекеттік мекемелер қатыса алған.
Әр көліктің бастапқы бағасы 8 миллион 395 мың теңге деп көрсетілген. Сауда нәтижесінде 8 шілдедегі жағдай бойынша аукцион мәртебесі «аяқталды» деп белгіленген.
Айта кетейік, бұл Жанәбіловтерден тәркіленген мүліктің алғашқы сатылымы емес. Бұған дейін олардың атына тіркелген тағы сегіз көлік саудаға шығарылған болатын.
Еске салайық, 2026 жылғы 13 наурызда Астана қаласының қылмыстық істер жөніндегі ауданаралық сотында Ерболат Жанәбілов пен Эльмира Төлегеноваға қатысты қылмыстық іс қарала бастаған. Сот барысында айыпталушылар мен олардың қорғаушылары отырысты жабық өткізуді сұрағанымен, бұл өтініш қанағаттандырылмаған.
Іс материалдарына сәйкес, блогерлер лицензиясыз кәсіпкерлікпен айналысып, аса ірі көлемде табыс тапты және қылмыстық жолмен алынған қаражатты заңдастырды деген айып тағылған.
Сот шешімімен Ерболат Жанәбіловке 2 жыл шартты жаза тағайындалып, мүлкі тәркіленді. Ал Эльмира Төлегенова 2 жылға бас бостандығынан айырылды.
DALAMEDIA admin
9
0