Павлодар облысында студенттер мен ірі кәсіпорын қызметкерлерінен ақша бопсалап келген деген күдікпен бір топ адам қолға түсті, — деп хабарлайды «Dalamedia» ақпараттық порталы.

Арнайы операцияны Павлодар облысы полиция департаментінің ұйымдасқан қылмысқа қарсы күрес басқармасы мен Ұлттық қауіпсіздік комитеті департаментінің қызметкерлері бірлесіп жүргізген. Нәтижесінде Ақсу және Екібастұз қалаларында бірнеше мәрте бопсалауға қатысы бар деген күдікке ілінген азаматтар ұсталды.

Алдын ала мәліметке сәйкес, күдіктілер адамдарды қорқытып, олардан тұрақты түрде ақша талап еткен. Зардап шеккендердің қатарында студенттер мен ірі өндіріс орындарының қызметкерлері болған.

Тінту барысында қолма-қол ақша, ұялы телефондар, банк карталары, түрлі құжаттар және қылмыстық іске қатысы бар өзге де айғақ заттар тәркіленді. Сондай-ақ күдіктілер пайдаланған автокөліктер айып тұрағына қойылды.

Павлодар облысы полиция департаменті ұйымдасқан қылмысқа қарсы күрес басқармасы бастығының орынбасары Диас Қадыровтың айтуынша, аталған дерек бойынша бопсалау фактісімен қылмыстық іс қозғалған. Полиция бөлімшесіне 10 адам жеткізіліп, олардың төртеуі сот шешімімен қамауға алынған. Қазір күдіктілердің осыған ұқсас өзге қылмыстарға қатысы бар-жоғы анықталып жатыр.

Еске салайық, бұған дейін Шымкентте полицейлерді бопсалады деген күдікпен блогер ұсталған болатын. Тергеу мәліметінше, жол-патрульдік полиция қызметкерлері 25 жастағы жүргізушіні тоқтатып, оның күмәнді әрекетіне байланысты медициналық куәландыруға жіберген. Сараптама нәтижесінде жүргізушінің мас күйде болғаны анықталған.

Жүргізуші әкімшілік жауапкершілікке тартылып, жүргізуші куәлігінен айырылу қаупі туындағаннан кейін мәселені шешу үшін блогерге жүгінген. Тергеу нұсқасына сәйкес, ол бұл мәселені 1 миллион теңгеге шешіп беруге уәде еткен.