Президент Қасым-Жомарт Тоқаев «Қазақстан Республикасының жаңа Конституциясының қабылдануына байланысты рақымшылық жасау туралы» заңға қол қойды. Құжат Мемлекет басшысының тапсырмасы бойынша әзірленген, — деп хабарлайды «Dalamedia» ақпараттық порталы.

Аталған заң Парламент депутаттарының бастамасымен дайындалып, қылмыстық саясатты ізгілендіруге бағытталған. Бұған дейін, 11 маусымда, Сенат депутаттары құжатты мақұлдаған болатын.

Заңға сәйкес, қылмыстық теріс қылықтар мен ауырлығы төмен қылмыс жасаған азаматтар қылмыстық жауапкершіліктен немесе негізгі жазадан босатылады.

Сондай-ақ рақымшылық сотталғандардың бірқатар санатына қолданылады. Атап айтқанда, орташа ауырлықтағы қылмыс жасағандардың өтелмеген жаза мерзімі екі есе қысқартылады. Ауыр және аса ауыр қылмыс жасаған азаматтарға да заңда көрсетілген талаптарға сәйкес жаза мерзімін қысқарту қарастырылған.

Сонымен бірге тәртібі жақсы деп танылған және жазасын өтеу мерзімінің аяқталуына бір жылдан аспайтын уақыты қалған сотталғандар қалған жазадан толық босатылады.

Алайда рақымшылық терроризм, экстремизм, сыбайлас жемқорлық қылмыстары, ұйымдасқан қылмыстық топтарға қатысу, азаптау, кәмелетке толмағандардың жыныстық қол сұғылмаушылығына қарсы әрекеттер жасаған адамдарға қолданылмайды. Сондай-ақ қылмысты қайталап жасағандар мен өмір бойына бас бостандығынан айыру жазасына кесілгендер бұл жеңілдікті пайдалана алмайды.

Заңда тәуелсіз Қазақстан тарихында алғаш рет әкімшілік рақымшылық туралы жеке норма енгізілген.

Оған сәйкес азаматтар, жеке кәсіпкерлер, нотариустар, адвокаттар, жеке сот орындаушылары және заң консультанттары бірқатар әкімшілік айыппұлдарды төлеуден босатылады.

Сонымен қатар сот шешімімен салынған айыппұлдар және азаматтар мен мемлекеттің қауіпсіздігіне қауіп төндіретін құқық бұзушылықтар бойынша берілген жазалар рақымшылыққа жатпайды.