Атырау облысында бір отбасының төрт мүшесінің өліміне қатысты өтіп жатқан сот процесінде басты айыпталушы Сұлтан Сәрсемәлиевке жаңа айыптар тағылды, — деп хабарлайды «Dalamedia» ақпараттық порталы. 

Мемлекеттік айыптаушылар сот отырысында айыптау актісіне өзгерістер мен толықтырулар енгізілгенін мәлімдеді. Судья Зарема Хамидуллина жаңа редакциядағы айыптау қорытындысын жариялады.

Жаңа айыптарға сәйкес, қайын атасы Мақсот Қарабалин мен қайын енесі Нәсіп Өтешқалиеваны өлтіру эпизодына «басқа қылмысты жасыру мақсатында адам өлтіру» белгісі қосылды. Ал Мирамгүл Қарабалинаны өлтіру ісі бойынша оның дәрменсіз жағдайда болғаны және өзге қылмысты жасыру мақсатында жасалғаны туралы қосымша саралау белгілері енгізілді.

Бұдан бөлек, Сұлтан Сәрсемәлиевке қаза тапқан адамдардың атына тағайындалған әлеуметтік төлемдер мен зейнетақыны заңсыз иеленді деген алаяқтық айыбы тағылды. Сондай-ақ бұрын алаяқтық ретінде қаралған малға қатысты эпизод енді «мал ұрлығы» бабы бойынша қайта сараланды.

Сот процесі жалғасып жатыр. Тергеу мен сот барысында істің барлық мән-жайы жан-жақты қаралатын болады.