2026 жылғы 23 маусым күні Жамбыл облысы әкімдігі ақпарат және қоғамдық даму басқармасының «Жастар ресурстық орталығы» КММ-нің ұйымдастыруымен автокөлік жүргізушілері арасында «Антисон» жастар акциясы өткізілді.
Іс-шараның мақсаты – жол қозғалысы қауіпсіздігін қамтамасыз ету, жүргізушілер арасында құқықтық мәдениетті қалыптастыру, ұзақ жолда көлік басқару кезінде ұйқышылдықтың алдын алу және жол-көлік оқиғаларының санын азайту болды.

Акция барысында «Жастар ресурстық орталығының» мамандары мен Жамбыл облысы Полиция департаментінің қызметкерлері жүргізушілермен түсіндіру жұмыстарын жүргізіп, жол қауіпсіздігін сақтаудың маңыздылығы туралы ақпарат берді. Әсіресе, ұзақ қашықтыққа қатынайтын жүргізушілердің шаршауы мен ұйқышылдық салдарынан орын алатын жол-көлік оқиғаларының алдын алу мәселелеріне ерекше назар аударылды.
Сонымен қатар, қатысушыларға «Заң мен тәртіп» қағидаттарының маңызы түсіндіріліп, заң талаптарын сақтау мен қоғамдық тәртіпке жауапкершілікпен қараудың қажеттілігі айтылды. Жүргізушілерге «Антисон» акциясының тиімділігі түсіндіріліп, жол үстіндегі қауіпсіздікті арттыруға бағытталған кеңестер берілді.

Акция аясында ақпараттық парақшалар таратылып, жол қозғалысы қауіпсіздігіне қатысты маңызды мәліметтер тұрғындар арасында кеңінен насихатталды. Іс-шара жол қозғалысына қатысушылардың өз өмірі мен өзге азаматтардың қауіпсіздігіне деген жауапкершілік сезімін арттыруға, қауіпсіз жүргізу мәдениетін қалыптастыруға және жол-көлік оқиғаларының алдын алуға бағытталды.

Ұйымдастырушылардың айтуынша, мұндай профилактикалық іс-шаралар алдағы уақытта да жалғасып, қауіпсіз қоғам мен қауіпсіз жол ортасын қалыптастыруға өз үлесін қоса береді.