Қазақстанда 2012 жылғы шығарылымдағы 2000 теңгелік банкноттардың айналым мерзімі аяқталады, — деп хабарлайды «Dalamedia» ақпараттық порталы.

Ұлттық банк мәліметінше, аталған банкноттарды қабылдау 24 маусымнан бастап тоқтатылады. Дегенмен ескі үлгідегі ақшаны бірден жарамсыз деп санауға болмайды. Екінші деңгейлі банктер мен «Қазпошта» бөлімшелері оларды жаңа үлгідегі банкноттарға тағы үш жыл бойы айырбастай алады.

Ал Ұлттық банктің аумақтық филиалдары ескі 2000 теңгеліктерді мерзімсіз қабылдап, айырбастауды жалғастырады.

Бұған дейін 2012 жылғы шығарылымдағы 10 000 теңгелік банкноттардың да айналымнан шығатыны хабарланған еді. Алайда Ұлттық банк бұл банкноттардың қолданылу мерзімін 2027 жылдың шілдесіне дейін ұзарту туралы шешім қабылдады.

Ведомствоның түсіндіруінше, екі банкноттың айналымнан қатар шығарылуы банк жүйесіне қосымша салмақ түсіруі мүмкін. Сондықтан мерзімді ұзарту халық пен кәсіпкерлерге ескі ақшаны біртіндеп ауыстыруға мүмкіндік береді.

Бұған дейін әлеуметтік желілерде бірнеше банкноттың жақын арада айналымнан алынатыны туралы ақпарат тараған болатын. Ұлттық банк бұл мәліметтерге қатысты нақты түсініктеме берген.