Ұлытау облысының орталығы Жезқазған қаласында тәулігіне 250 адам қабылдайтын заманауи емхананың іргетасы қаланды.Үш қабатты медициналық нысанның жалпы аумағы шамамен 8,5 мың шаршы метрді құрайды. Жобаны “Верный Капитал” компаниялар тобының құрамындағы Beeline цифрлық операторы мен “Zhyly Zhurek Foundation” қоры қолдап отыр.

Салтанатты рәсімге Ұлытау облысының әкімі Дастан Рыспеков пен қор директоры Анар Жұмағұлова қатысып, жаңа нысанның өңір тұрғындары үшін маңызын атап өтті.

Облыс әкімі Дастан Рыспековтің айтуынша, Жезқазғанның батыс ауданы алдағы жылдары қарқынды дамып, өңірдің жаңа орталығына айналады.

– Алдағы жылдары бұл ауданға 18 мыңға жуық тұрғын қоныстанады деп күтілуде. Мұнда 80-нен астам көпқабатты тұрғын үй салу жоспарланған. Сондықтан әлеуметтік инфрақұрылымды дамыту – басты міндеттердің бірі. Бүгін іргетасы қаланған емхана – осы бағыттағы жүйелі жұмыстың нәтижесі, – деді өңір басшысы.

Жаңа медициналық мекемеде консультациялық-диагностикалық кабинеттер, 15 орындық күндізгі стационар, сәулелік диагностика бөлімшесі, клиникалық-диагностикалық зертхана, амбулаториялық хирургия орталығы және әйелдер консультациясы жұмыс істейді.

Сондай-ақ емхана аумағында тәулік бойы қызмет көрсететін тоғыз бригадалық жедел жәрдем станциясы ашылады. Бұл тұрғындарға шұғыл медициналық көмекті жедел әрі сапалы көрсетуге мүмкіндік береді.