Ұлытау облысында тұрғын үй құрылысы қарқын алып, алдағы жылдары жүздеген отбасы қоныс тойын тойламақ, — деп хабарлайды «Dalamedia» ақпараттық порталы.

Өңірлік коммуникациялар қызметі алаңында Құрылыс, сәулет және қала құрылысы басқармасының басшысы Ринат Алматов облыстағы құрылыс саласының қазіргі ахуалы мен жоспарлары жөнінде баяндады. Оның айтуынша, тұрғын үй құрылысы кезең-кезеңімен жүзеге асырылып, нақты көрсеткіштермен ілгерілеп келеді.

2025 жылдың қорытындысы бойынша облыста 109,8 мың шаршы метр тұрғын үй пайдалануға берілген. Ал биыл барлық қаржыландыру көздері есебінен 111,4 мың шаршы метр баспана салу жоспарланған.

Қазіргі таңда жеке инвестиция есебінен жалпы аумағы 57,6 мың шаршы метрді құрайтын 14 коммерциялық тұрғын үйдің құрылысы жүріп жатыр. Соның ішінде 8 үйді биыл аяқтап, пайдалануға беру көзделсе, қалған 6 нысанның құрылысы 2027 жылға өтпелі.

Жалпы жоспарға сәйкес, 2026 жылы тағы 14 тұрғын үйдің құрылысы аяқталады. Оның ішінде 3-і кредиттік, 3-і жалға берілетін, ал 8-і коммерциялық тұрғын үй. Бұл 833 отбасының баспаналы болуына мүмкіндік береді.

Сонымен қатар, 2024 жылдан бері облыс орталығының Батыс ауданында жаңа шағын ауданды инфрақұрылыммен қамтамасыз ету үшін магистральдық желілер тарту жұмыстары жүргізіліп жатыр. Жоба 2026 жылы толық аяқталуы тиіс.

Биыл өңірде әлеуметтік нысандар құрылысы да қатар жүріп жатыр. Жалпы саны 11 жоба іске асырылуда.

Атап айтқанда, Қаражал қаласында жабық хоккей корты мен көпфункционалды орталықтың құрылысы жүргізілуде. Хоккей корты мен Ұлытау ауылындағы жабық жүзу бассейні қыркүйек айында пайдалануға берілмек. Ал Қаражалдағы көпфункционалды орталық жыл соңына дейін ел игілігіне тапсырылады.

Жезқазғанда курсанттарға арналған павильоны бар автоматтандырылған автодром құрылысы үшін мердігер анықталып, қажетті техника мен жабдықтар жұмылдырылған. Сондай-ақ оқушылар сарайының құрылысы аяқталып, қазір аумақты абаттандыру жұмыстары жүріп жатыр.

Ұлытау ауылында бір ауысымда 100 адам қабылдайтын емханасы бар 20 орындық ауылдық аурухана құрылысы жалғасуда. Жоба 2026 жылдың соңында аяқталады деп жоспарланған.

Сәтбаев қаласында индустриялық парктің инженерлік-коммуникациялық инфрақұрылымы биыл мамыр айында аяқталмақ.

Бұдан бөлек, 2026 жылы өңірде үш жаңа жоба басталады. Олар – Жаңаарқа ауданындағы 100 орындық инклюзияны қолдау орталығы, Сәтбаевтағы №7 мектептің спорт залы және Ақселеу Сейдімбек атындағы орта мектеп жанынан спорт зал салу жобасы.