7-қабаттан құлап қаза тапқан КИМЭП студенті Ақнәр Гүлстанның өліміне қатысты қылмыстық іс бойынша әзірге ешкім күдікті ретінде танылған жоқ. Бұл туралы Ішкі істер министрінің орынбасары Санжар Әділов мәлімдеді, — деп хабарлайды «Dalamedia» ақпараттық порталы.

Оның айтуынша, тергеу жұмыстары әлі де жалғасып жатыр. Іс өндірістік тергеу бөлімінде қаралуда.

Сондай-ақ іс бойынша бірқатар сараптамалар мен материалдар Қытайға жолданған. Бұған себеп — марқұмның Қытайда тұрып, сол елде білім алғаны. Қазіргі уақытта қазақстандық тарап жауапты күтуде.

Қайғылы оқиға 2024 жылдың шілдесінде Алматыдағы тұрғын үй кешендерінің бірінде болған. 22 жастағы студент жетінші қабаттан құлап, көз жұмған. Осы факті бойынша қылмыстық іс қозғалып, оқиғаның өз-өзіне қол жұмсау ма, әлде өзге себептен бе болғаны әлі нақтыланған жоқ.

Марқұм Қытайдан келген этникалық қазақ болған. Онымен бірге оқыған екі студент те этникалық қазақтар, Қытай азаматтары ретінде көрсетілген. Олардың бірі — Ранна Аскар — Ақнәрді 2024 жылдың 19 шілдесінде үйіне шақырған. Сол түні студент жетінші қабаттан құлап, қаза тапқан. Кейін ол Қазақстан азаматтығын алған.

Екінші студент — Дидар Мұқият — оқиға кезінде Ақнәрмен бір жатақханада тұрған, сол уақытта Қытай азаматы болған.

Марқұмның анасы қызының денесінен соққы іздері, тістеу, тырнау белгілері, сынған тырнақтар мен жұлынып қалған шаш анықталғанын айтқан. Бұл деректердің бір бөлігі сот-медициналық сараптамамен де расталған.

Іс бастапқыда «өз-өзіне қол жұмсауға дейін жеткізу» бабымен тіркелген. Алайда туыстары бұл нұсқамен келіспей, істі кісі өлтіру бабымен қайта саралауды талап етіп отыр. Марқұмның анасы тергеудің созылуына наразылық білдіріп, әділдік сұрап Президентке үндеу жасаған.