Астанадағы LRT станцияларында енді Ұлттық ұланның әскери қызметшілері қоғамдық тәртіп пен қауіпсіздікті қамтамасыз етуге жұмылдырылды, ,-деп хабарлайды «Dalamedia» ақпараттық порталы.

Ұлттық гвардияның баспасөз қызметі бұл шешім жолаушылар легінің көбеюі мен елорда тұрғындарының жеңіл рельсті көлікке деген қызығушылығы артуымен байланысты екенін түсіндірді.

Әскери қызметшілердің негізгі міндеті – станция ішіндегі және оған іргелес аумақта қоғамдық тәртіпті қадағалау. Олар жолаушыларға бағыт-бағдар беріп, қауіпсіз қозғалысқа көмектеседі, сондай-ақ құқық бұзушылықтардың алдын алуға назар аударады.

Бұдан бөлек, сарбаздар төтенше жағдайлардың алдын алу, азаматтардың қауіпсіздігін қамтамасыз ету және қажет болған жағдайда көмек көрсету бағытында жұмыс істейді. Бұл ретте олар полиция қызметкерлері мен көлік саласының мамандарымен, сондай-ақ LRT әкімшілігімен бірлесе әрекет етеді.

Қазіргі таңда Ұлттық ұлан қызметі елорданың 17 станциясында екі ауысымдық тәртіппен ұйымдастырылған.