Шымкент қалалық Төтенше жағдайлар департаментінің Instagram желісіндегі Direct парақшасына 4 жасар баланың анасынан ерекше хат келіп түсті. Онда ұлының өрт сөндірушілерге қатты қызығатыны, өрт сөндіру көліктерін жақсы көретіні және сирена дауысын ести сала құтқарушылардың жұмысын көруге асығатыны айтылған, -деп хабарлайды «Dalamedia» ақпараттық порталы.

Анасының айтуынша, бүлдіршін құтқарушылар туралы мультфильмдерді сүйіп көреді және нағыз өрт сөндіру техникасын жақыннан көріп, өрт сөндірушілермен танысуды көптен армандаған.

Баланың арманы мен жуырда төрт жасқа толғанын естіген өрт сөндіру бөлімінің қызметкерлері оған тосын сый жасауды ұйғарды. Олар кішкентай қонақты бөлімге арнайы шақырып, экскурсия ұйымдастырды.

Экскурсия барысында бүлдіршін өрт сөндіру автокөліктерін жақыннан тамашалап, арнайы техникалардың жұмысымен танысты. Сондай-ақ өрт сөндіру көлігінің кабинасына отырып көріп, құтқарушылармен еркін тілдесті.

Кездесу соңында өрт сөндірушілер жас қонақты туған күнімен құттықтап, естелік сыйлықтар табыс етті. Олар балақайға зор денсаулық, шаттық пен бақытты балалық шақ тіледі.