Қазақстанда 14 пен 18 жас аралығындағы 1,7 миллион жасөспірімге еңбек етуге рұқсат берілген, – деп хабарлайды «Dalamedia» ақпараттық порталы. Бұл туралы Үкімет отырысында еңбек және халықты әлеуметтік қорғау министрі Асқарбек Ертаев мәлімдеді.

Министрдің айтуынша, бүгінде 5,3 мың оқушы ресми түрде жұмысқа орналасқан. Олардың басым бөлігі сауда, қоғамдық тамақтану, ойын-сауық және демалыс қызметтері саласында еңбек етіп жүр.

Жасөспірімдер көбіне көгалдандыру жұмысшысы, курьер, даяшы, сатушы-кеңесші, аспаз көмекшісі және аниматор қызметтерін атқарады.

Сондай-ақ министрлік кәмелетке толмағандардың қауіпсіздігін күшейту үшін арнайы жүйе енгізуді жоспарлап отыр. Жаңа платформа арқылы 14 жастан асқан жасөспірімдер өздеріне лайық жұмыс іздей алады. Онда курьерлік қызмет, қоғамдық жұмыстар, лагерьдегі көмекшілік пен көгалдандыру секілді бос жұмыс орындары жарияланбақ.