25–29 мамыр аралығында Астана қаласында көлік қозғалысына уақытша шектеулер енгізіліп, аспан кеңістігінде әскери авиацияның ұшуы байқалуы мүмкін, — деп хабарлайды «Dalamedia» ақпараттық порталы.

Мемлекеттік күзет қызметі тұрғындар мен қала қонақтарына арнайы ескерту жариялады. Онда Ресей Президентінің Қазақстанға мемлекеттік сапары және Жоғары Еуразиялық экономикалық кеңес отырысына байланысты қауіпсіздік шаралары күшейтілетіні айтылған.

Ресми хабарламаға сәйкес, осы күндері елорда көшелерінің жекелеген бөліктерінде көлік қозғалысы уақытша шектеледі. Сонымен қатар арнайы мемлекеттік органдар, құқық қорғау құрылымдары мен Қарулы күштердің ресурстары, оның ішінде әскери ұшақтар мен техникалар да тартылмақ.

Бұдан бөлек, қорғаныс министрлігіне тиесілі авиация құралдарының да ұшуы жоспарланған.

Мемлекеттік күзет қызметі тұрғындардан халықаралық деңгейдегі маңызды іс-шаралар кезінде енгізілетін қауіпсіздік шараларына түсіністікпен қарауды сұрады.

Айта кетейік, 27 мамырда Ресей Президенті Владимир Путин Қазақстан Президенті Қасым-Жомарт Тоқаевтың шақыруымен елге келетіні хабарланған болатын.