Бүгін, 10 мамырдан бастап Астана аспанында әскери авиацияның ұшу жаттығулары басталды. Бұл туралы ҚР Қорғаныс министрлігі бұған дейін ескерту жасаған болатын, - деп хабарлайды Dalamedia.

Ведомствоның мәліметінше, бұл шаралар 15 мамырға жоспарланған ҚР Қарулы Күштері Әуе қорғанысы күштерінің демонстрациялық ұшуына дайындық аясында өткізіліп жатыр. Жаттығулар кезінде елорда аспанында жойғыш ұшақтардың дыбысы естіліп, олардың маневрлері байқалуы мүмкін.

Министрлік ұшулардың қауіпсіз биіктікте өтіп жатқанын және тұрғындар үшін ешқандай қауіп төндірмейтінін атап өтті. Қала тұрғындары мен қонақтарынан уақытша шу деңгейінің артуына түсіністікпен қарау сұралады.

Еске сала кетейік, 15 мамыр күні өтетін негізгі шарада әскери ұшақтар арнайы түрлі-түсті түтін қолдана отырып, көрсетілім өткізеді. Бұл түтіндер қоршаған ортаға мүлдем зиянсыз екені ресми түрде расталған.