Жамбыл облысындағы Қаратау бөктерінде алтын барлау жұмыстарын жүргізген шетел азаматтарына жергілікті тұрғындар наразылық білдірді. Ауыл халқы ерекше қорғалатын табиғи аумақта ауыр техникамен қазба жүргізілгеніне қарсы болып, шетелдіктерді аумақтан кетіруді талап еткен, — деп хабарлайды «Dalamedia» ақпараттық порталы.

Тұрғындардың айтуынша, белгісіз азаматтар мемлекеттік маңызы бар ерекше қорғалатын аумақта жер қазып, табиғатқа зиян келтірген. Жергілікті халық тау ішінде жүрген шетел азаматтарынан мән-жайды сұрағанымен, нақты жауап ала алмағандарын айтады.

Кейін олардың алтын барлау жұмыстарын жүргізуге келгені белгілі болған. Алайда ауылдықтар ата-қоныс пен мал жайылымына зиян келгеніне алаңдап отыр. Әсіресе тұрғындар жергілікті биліктің халықпен ақылдаспай рұқсат бергеніне наразы.

“Ата-қонысымыз, мал жайылатын жер бүлініп жатыр. Табиғатқа зиян келді. Жұртпен санаспай жерді қалай берген?” деп тұрғындар өз қарсылығын ашық білдірген.

Ауыл халқының сөзінше, Жуалы Қарашат мемлекеттік маңызы бар ерекше қорғалатын табиғи аумағы аумағында мұндай жұмыстарды жүргізу заңға қайшы.

Оқиғадан кейін табиғатты қорғау инспекторлары заңбұзушылық бойынша хаттама толтырып, материалдарды құқық қорғау органдарына жолдаған. Алайда тұрғындар шетел азаматтарына ешқандай жаза қолданылмағанын айтып отыр.

Ал аудан әкімдігі бұл тек барлау жұмыстары екенін мәлімдеді. Талас ауданы әкімінің орынбасары Дәулет Төленді компанияның кен барлауға арнайы рұқсаты бар екенін айтты.

Оның сөзінше, халықтың наразылығына байланысты түсіндіру жұмыстары жүргізілген. Сондай-ақ 29 мамыр күні қоғамдық тыңдау өтеді. Егер тұрғындар қарсы болса, барлау жұмыстары тоқтатылатынын жеткізді.

Жергілікті жұрт жауынға қарамай жиналғандарының бекер емес екенін айтады. Олар бүлінген жерді қалпына келтіруді және қазба жұмыстарын жүргізгендердің бұл аумаққа қайта оралмауын талап етті. Сонымен бірге тұрғындар алдағы қоғамдық тыңдауға да қарсы екенін білдіріп отыр.

Айта кетейік, бұған дейін Шығыс Қазақстан облысы аумағында “Азаматтарға арналған үкімет” мемлекеттік корпорациясының жоғары лауазымды қызметкері лицензиясыз алтын өндірді деген күдікке ілінген еді. Тергеу мәліметінше, заңсыз қазба жұмыстары салдарынан табиғатқа 300 миллион теңгеден астам шығын келген.