Алматы қаласындағы №8 қалалық клиникалық ауруханада еңбек еткен медицина қызметкері МӘМС жүйесі аясында пациенттерді тегін тексерудің орнына ақылы қызметке жіберу фактісін байқағанын айтып, осыдан кейін қысым көріп, жұмыстан шығарылғанын мәлімдеді, — деп хабарлайды «Dalamedia» ақпараттық порталы.

Оның айтуынша, мекемеге жаңадан орналасқан кезде МӘМС арқылы тегін жасалуы тиіс МРТ тексерісіне пациенттің ақылы түрде, яғни 15 мың теңгеге жіберілгенін байқап қалған. Осы жайтты ол видеоға түсіріп, аурухана басшылығына жеткізген.

Алайда қызметкердің сөзінше, шағымнан кейін жағдай оң шешілмеген. Керісінше, өзіне қатысты қысым күшейіп, ақысыз әрі ресми рәсімделмеген тапсырмалар берілген. Сондай-ақ “мұндай тәжірибе бұл мекемеде қалыпты жағдай” деген мазмұндағы сөздер айтылғанын алға тартады. Бұдан бөлек, бөлім ішіндегі әріптестер тарапынан да кедергілер басталған.

Оның айтуынша, кейін жағдай ушығып, әріптестердің бірімен жанжал туындаған, соңы айғай мен балағат сөздерге дейін жеткен. Алайда бұл оқиғаға байланысты аурухана әкімшілігі нақты шара қабылдамаған.

Осыдан соң ол жұмыстан кеткенін айтады. Қызметкер төрт кәмелетке толмаған баланың анасы екенін және отбасының жалғыз асыраушысы екенін жеткізген.

Кейін ол бұл жағдай бойынша сотқа жүгінген. Бірақ сот барысында іс басқа қырынан көрсетіліп, ол ықтимал заңбұзушылықты хабарлаған тұлға ретінде емес, “медициналық әдеп нормаларын бұзған қызметкер” ретінде сипатталғанын айтады.

Қолында видео мен дәлелдер болғанына қарамастан, сот оларды ескермегенін алға тартқан ол бірінші инстанция шешімімен келіспей, апелляцияға беретінін мәлімдеді.