Мәжіліс депутаты Мұрат Әбенов жүргізушілерді алкотестер арқылы тексеру мәселесіне қатысты пікір білдіріп, қолданыстағы тәртіпті қайта қарауды ұсынды, — деп хабарлайды «Dalamedia» ақпараттық порталы.

Депутаттың айтуынша, ағзада 0,1 промилле алкоголь анықталғаны үшін азаматтарды қатаң жауапкершілікке тарту әділетсіз. Оның сөзінше, Қазақстанда кем дегенде 0,3 промилле деңгейіндегі рұқсат етілген шекті қайта енгізу қажет.

Мұрат Әбенов қазіргі алкотестер құрылғылары кей жағдайда техникалық ауытқулар көрсетуі мүмкін екенін айтты. Бұған қоса, адамның ағзасындағы ерекшеліктер, кейбір дәрілер, асқазан қышқылының жоғары болуы, сондай-ақ қымыз бен айран секілді табиғи ашытылған өнімдер де көрсеткішке әсер етуі ықтимал.

Депутаттың пікірінше, тек алкотестердің нәтижесіне сүйеніп қорытынды жасау дұрыс емес. Ол жүргізушілерге міндетті түрде медициналық куәландырудан өтіп, қан талдауын тапсыру мүмкіндігі берілуі керек екенін жеткізді.

“Егер қан талдауы алкоголь барын көрсетсе, азамат екі сағат ішінде қайта талдау тапсыруға құқылы болуы қажет. Қазіргі жүйе жүргізушілер арасында көп сұрақ тудырып отыр. Әсіресе жеті жылға жүргізуші куәлігінен айыру секілді қатаң жаза қоғамда наразылық күшейтеді”, – деді депутат.

Сондай-ақ ол алкотестер көрсеткішіне сыртқы факторлардың да әсер етуі мүмкін екенін атап өтті. Соның салдарынан жүргізушілер өзін қорғансыз сезінетінін, ал мұндай жағдайлар сыбайлас жемқорлық тәуекелдерін арттыруы мүмкін екенін айтты.

Айта кетейік, бұған дейін әлеуметтік желілер мен БАҚ-та 2025 жылғы 16 қыркүйектен бастап жүргізушілердің мастығын анықтау ережелері өзгереді деген ақпарат тараған болатын. Кейін бұл мәліметті Қазақстан Республикасының Ішкі істер министрлігі ресми түрде жоққа шығарды.