Атырау халықаралық әуежайында «Атырау – Шымкент» бағыты бойынша ұшпақ болған 34 жастағы Түркістан облысының тұрғыны тексеріс кезінде әуежай қызметкерлерінің «заңға қайшы заттар бар ма?» деген сұрағына «тапанша бар» деп жауап берген. Кейін ол рейске жіберілмей қалған, ,-деп хабарлайды «Dalamedia» ақпараттық порталы.

Оқиғаға қатысты жүргізілген тексеріс барысында жолаушының айтқан сөзі шындыққа сәйкес келмейтіні анықталды. Осыдан кейін тиісті органдар заң аясында шара қабылдаған.

Аталған дерек бойынша ҚР Әкімшілік құқық бұзушылық туралы кодексінің 434-бабы 1-бөлігіне сәйкес әкімшілік хаттама толтырылып, іс Атырау қаласының мамандандырылған әкімшілік сотына жолданды.

Көліктегі полиция департаменті әуежай аумағында жалған ақпарат таратпау керегін ескертіп, азаматтарды қоғамдық қауіпсіздік талаптарын қатаң сақтауға шақырды.