Қазақстанда 1-сыныпқа қабылдау процесіне қатысты жаңа ереже бекітіліп, құжат тапсыру мерзімдері өңірлер бойынша кезең-кезеңімен бөлінді. Тиісті өзгерістер оқу-ағарту және цифрлық даму салаларына жауапты министрліктердің бірлескен бұйрығымен енгізілді, — деп хабарлайды «Dalamedia » ақпараттық порталы».

Жаңа тәртіпке сәйкес, балаларды 1-сыныпқа қабылдау 2026 жылғы 27 мамыр мен 31 тамыз аралығында жүзеге асырылады.

Өңірлер бойынша қабылдау кестесі төмендегідей:

— 27 мамыр – 31 тамыз: Астана, Қызылорда, Батыс Қазақстан, Жетісу және Абай облыстары;
— 10 маусым – 31 тамыз: Алматы, Ақмола, Ақтөбе, Жамбыл, Шығыс Қазақстан облыстары;
— 18 маусым – 31 тамыз: Шымкент, Алматы облысы, Қостанай, Павлодар, Атырау облыстары;
— 29 маусым – 31 тамыз: Түркістан, Маңғыстау, Қарағанды, Солтүстік Қазақстан және Ұлытау облысы.

Бұл ереже бастауыш, негізгі және жалпы орта білім беру ұйымдарына қабылдау тәртібін қамтиды.

Құжатта көрсетілгендей, егер бала мектеп жанындағы дайындық бағдарламасын сол оқу орнында аяқтап, әрі қарай сол мектепте оқуды жалғастыруды қаласа, ол ата-анасының өтініші негізінде автоматты түрде 1-сыныпқа қабылданады.

Сондай-ақ электронды жүйеде бір мезетте түсетін өтініш саны шектен асқан жағдайда, өтініш берушілер «Күту бөлмесіне» жіберіледі. Бұл жүйе арқылы ата-аналар өз кезегін бақылап отыра алады. Кезек келген кезде өтініш беруші автоматты түрде қызмет алу бетіне қайта бағытталады.

Бұған дейін 1-сыныпқа құжат қабылдау мерзімін өзгерту мәселесі талқыланған болатын.

Оқу-ағарту министрі Жұлдыз Сүлейменова бұл шешімнің өткен жылдардағы тәжірибе негізінде қабылданғанын айтты.

«Бұған дейін құжаттар 1 сәуірге дейін қабылданатын. Алайда бұл кезеңде мектептерде оқу процесі жүріп жатады. Сол уақытта мұғалімдер мен мектеп әкімшілігіне қосымша жүктеме түсетін. Сондықтан осы жағдайларды ескере отырып, биыл қабылдау мерзімін қайта қарадық», – деді министр.