Алматы әкімдігі 2026 жылы халықаралық туристік көрмелер мен шетелдегі таныстыру шараларына қомақты қаржы жұмсамақ, ,-деп хабарлайды «Dalamedia» ақпараттық порталы. Қала билігі бұл қаражатты Алматының туристік әлеуетін шетелде насихаттауға бағыттап отыр.

Жоспарға сәйкес, Алматы әлемнің бірнеше ірі қаласында өтетін халықаралық туризм көрмелеріне қатысады. Олардың қатарында Үндістандағы OTM Mumbai, БАӘ-дегі ATM Dubai, Оңтүстік Кореядағы SITF Seoul, Қытайдағы ITB China, Гонконгтағы ITE Hong Kong, Жапониядағы Tourism Expo Japan, Катардағы QTM Doha, Сингапурдағы ITB Asia және басқа да алаңдар бар.

Әр көрме аясында «Алматының туризм күндері» ұйымдастырылып, қала туристік бағыт ретінде жеке таныстырылады. Яғни, әкімдік тек көрмеге қатысумен шектелмей, арнайы презентациялар өткізіп, шетелдік серіктестермен іскерлік кездесулер өткізуді көздеп отыр.

Мемлекеттік сатып алу порталындағы мәліметке сүйенсек, ең қымбат бағыт — ITB Asia Singapore көрмесі. Оған 103,4 миллион теңге қарастырылған. Ал Tourism Expo Japan үшін 86,4 миллион теңге, ITE Hong Kong-қа 82,8 миллион теңге, ATM Dubai-ге 82,6 миллион теңге бөлінбек.

Сондай-ақ OTM Mumbai көрмесіне 82,4 миллион, SITF Seoul-ге 81,7 миллион, ITB China Shanghai-ға 80,3 миллион, GITF Guangzhou-ға 78,6 миллион, QTM Doha-ға 78,1 миллион теңге жоспарланған. Ең төмен сома MATTA Fair Malaysia көрмесіне тиесілі — 74,2 миллион теңге.

Жалпы алғанда, барлық халықаралық бағытқа 831,1 миллион теңге жұмсау көзделген. Бұл шамамен 1 миллиард теңгеге жуық қаржы.

Құжаттарға қарағанда, көрмелер кәдімгі таныстыру емес, ауқымды шара форматында өтеді. Мәселен, OTM Mumbai көрмесінде ұлттық тағамдар ұсынылып, қазы, құрт, жент пен кептірілген жемістерден дәм татқызу жоспарланған. Сонымен бірге қонақтарға арнайы сыйлық пакеттері таратылып, ұлттық нақыштағы киім киген қызметкерлер қазақы дәстүрлерді таныстырады.

Техникалық талаптар да ауқымды. Мердігер компания құрамында халықаралық аналитика маманы, туризм сарапшысы, аудармашылар, PR-маман, маркетолог, гид, дизайнер, дрон операторы және өзге де мамандардан құралған кәсіби команда болуы тиіс.

Алматы әкімдігі мұны имидждік шығын емес, экономикалық инвестиция ретінде бағалап отыр. Ведомствоның мәліметінше, мұндай шаралар туристік ағынды көбейтіп, қала экономикасына серпін береді.

Туризм басқармасының дерегінше, 2025 жылы өткен B2B кездесулер қорытындысында шамамен 180 келісім жасалып, Алматыға 160 мыңнан астам шетелдік турист тарту жоспарланған.

Айта кетейік, былтыр Алматы 9 халықаралық көрмеге қатысып, 270 келісім жасаған. Соның нәтижесінде 224 мыңға жуық шетелдік турист тарту көзделген. Ал 2025 жылдың тоғыз айында Алматы қонақ үйлері 1,8 миллион турист қабылдаған.