ҚР Президенттік орталығында IX Халықаралық «Astana Eurasian Book Fair – 2026» кітап көрме-жәрмеңкесінің салтанатты ашылу рәсімі өтті, деп хабарлайды Dalamedia.

Орталық Азиядағы ең ауқымды мәдени-ағартушылық шараға мемлекет және қоғам қайраткерлері, танымал жазушылар мен шетелдік елшілер қатысып жатыр.

«Astana Eurasian Book Fair – 2026» көрме-жәрмеңкесін Мәдениет және ақпарат министрлігі, Астана қаласы әкімдігі және «Qazaq Creative» креативті индустрияларды дамыту қорының қолдауымен «Фолиант» баспасы ұйымдастырып отыр.

Көрмеге 80-нен астам кітап баспасы, ғылыми-білім беру және полиграфиялық компания қатысуда. Олардың жартысы — қазақстандық ұйымдар. Сондай-ақ шараға Қазақстан, Ресей, Түркия, Қырғызстан, Өзбекстан, Әзербайжан, Моңғолия, Испания, Қытай, Иран, Беларусь, Португалия, Венесуэла және Ұлыбританиядан көптеген ұйымдар қатысып жатыр.

«Astana Eurasian Book Fair – 2026» бағдарламасы бес күндік мәдени-іскерлік шараларға есептелген. Көрме аясында жаңа кітаптардың тұсаукесері, авторлармен кездесу, қолтаңба сессиялары және балалар алаңында арнайы шеберлік сағаттары өтеді.

Атап айтқанда, Түркияның Мәдениет және туризм министрлігінің қолдауымен шыққан «Түрік асханасы» кітабы, Бекарыс Шойбековтың «Айтыстың алтын айдар Бекарысы» айтыс жинағы, Маржан Ершудың «Жалғыз қол» поэмасы, «Заманауи тұлғалар» сериясынан «Елдос Сметов. Сабыр. Сенім. Жеңіс» кітабы, Ерлан Қожабаевтың «Қазақ оюлары» фотоальбомы, Анджей Сапковскийдің «Ведьмак» фантастикалық шығармасы, Ұларбек Дәлейдің «Бату хан» тарихи романы, Әлішер Рахаттың «Иесіз көлеңке» кітабы, испан жазушысы Хавьер Мороның «Үміт саяхаты» туындысы, Эрнест Хемингуэйдің «Қоңырау кімге соғылады» романы, әзербайжан ақыны Расмия Сабирдің «Өлең-әйел» кітабы, Байыт Қабанұлының «Моңғол өлеңі» кітабы, Нұрсұлтан Мықтыбайдың «Ақ Жайықтың көз жасы» шығармасы, сондай-ақ «Түркістан – мәңгілік және үнемі жаңа» және «Димаш Құдайберген. Шексіз әуен» атты кітап-альбомдардың тұсауы кесіледі.

Сонымен қатар 23 сәуір – Ұлттық кітап күніне орай ҚР Мәдениет және ақпарат министрлігі ұйымдастырған «Ұлттық кітап» республикалық байқауының қорытындысы бойынша жеңімпаз баспаларды марапаттау рәсімі өтеді.

Еске сала кетейік, IX Халықаралық «Astana Eurasian Book Fair – 2026» кітап көрме-жәрмеңкесі 22-26 сәуір аралығында Астанадағы ҚР Президенттік орталығында өтіп жатыр.