Батыс Қазақстан облысындағы Жалпақтал ауылында Эйфель мұнарасының көшірмесі орнатылып жатыр, -деп хабарлайды «Dalamedia» ақпараттық порталы.

Биіктігі 30 метр болатын нысанды ауылға жергілікті мектеп түлектері сыйға тартуды ұйғарған. Бұл бастама Жалпақталда бірнеше жылдан бері жалғасып келе жатқан дәстүрдің бір бөлігі саналады.

Ауыл тұрғындарының айтуынша, мектеп бітірген түлектер мерейтойлық кездесулерінде туған жерге тарту жасап келеді. Осы уақытқа дейін олар бірнеше саябақ, балалар алаңы, мүсіндер мен субұрқақтар салдырған. Ал биыл ауылға Эйфель мұнарасының көшірмесін орнату туралы шешім қабылдаған.

Әлеуметтік желіде бұл бастама қызу талқыға түсті. Бірі алдымен ауыл ішіндегі жол мәселесін шешу қажет екенін айтса, енді бірі дәл осындай ерекше нысанның арқасында Жалпақтал туралы бүкіл ел білгенін алға тартуда.