Шерхан Мұртаза атындағы Халықаралық Тараз университетінің студенттер үйінде «Зорлық-зомбылықсыз отбасы – бақытты қоғам» тақырыбында тағылымды кездесу өтті, -деп хабарлайды «Dalamedia» ақпараттық порталы.

Іс-шараға Жамбыл облысы Полиция департаментінің қызметкерлері қатысып, студент жастармен еркін форматта әңгіме өрбітті. Кездесу барысында тұрмыстық зорлық-зомбылықтың алдын алу, отбасы құндылықтарын нығайту және құқықтық сауаттылықты арттыру бағытындағы мәселелер кеңінен сөз болды.

Сонымен қатар қоғамдағы өзекті түйткілдердің бірі – кибербуллинг тақырыбы да назардан тыс қалмады. Мамандар әлеуметтік желідегі әдепсіздік, психологиялық қысым көрсету және интернеттегі қауіпсіздік жайын түсіндіріп, кибербуллингтің алдын алу жолдары мен заң алдындағы жауапкершілік туралы ақпарат берді.

Кездесу соңында студенттер өз ойларын ортаға салып, сұрақтарына нақты жауап алды. Мұндай басқосулар жастар арасында қауіпсіз әрі саналы орта қалыптастыруға бағытталған маңызды қадам екені айтылды.