Киевте 15 мамыр Ресей әскерінің жаппай шабуылы салдарынан қаза тапқандарды еске алу үшін аза тұту күні жарияланды, деп хабарлайды «Dalamedia» ақпараттық порталы.

Қала билігінің мәліметінше, бұл күндері барлық ойын-сауық шаралары тоқтатылып, мемлекеттік тулар төмен түсіріледі. Шешімді Киев мэрі Виталий Кличко мәлімдеген.

Шабуыл кезінде Дарницкий ауданында орналасқан тоғыз қабатты тұрғын үй қатты зақымданып, бір подъезі толықтай опырылып түскен. Құтқарушылар үйінді астында қалғандарды іздеу жұмыстарын әлі де жалғастырып жатыр.

Соңғы дерек бойынша, қаза тапқандар саны 24 адамға жеткен. Олардың үшеуі – балалар. Тағы 30 адам үйінді астынан құтқарылған.

Виталий Кличконың айтуынша, бұл Киевке жасалған соңғы айлардағы ең ауыр соққылардың бірі саналады.

Украина президенті Владимир Зеленскийдің мәлімдеуінше, үш күндік бітім аяқталғаннан кейін Ресей әскері Украина аумағына 1567 дрон мен 56 зымыран ұшырған. Ең ауыр зардап Киевте тіркелген.

Мемлекет басшысы ел үшін әуе қорғанысы жүйелері мен қажетті оқ-дәрілермен қамтамасыз ету басты басымдық болып отырғанын атап өтті. Оның сөзінше, мамыр–маусым айларындағы дипломатиялық жұмыс дәл осы бағыттағы қолдауға қарай бағаланбақ.

Сонымен қатар, соңғы уақытта Украина тарапы Ресей аумағындағы бірнеше өңірге дронмен соққы жасағаны хабарланды. Атап айтқанда, Туапсе, Пермь, Чебоксары және Орынбор қалалары аталады. Киев бұл шабуылдардың нысанасы ретінде қорғаныс өнеркәсібі кәсіпорындары мен мұнай өңдеу зауыттарын көрсетіп отыр.