Маңғыстау облысының Жаңаөзен қаласында арбаға таңылған мүмкіндігі шектеулі азаматты соққыға жықты деген күдікпен қоғам белсендісі ұсталды. Қазір аталған дерек бойынша құқық қорғау органдары тергеу жүргізіп жатыр, — деп хабарлайды «Dalamedia» ақпараттық порталы.

Әлеуметтік желіде тараған видеода ер адамның бөлме ішінде әйелмен сөзге келіп, кейін ашуға булығып арбадағы азаматқа күш қолданғаны байқалады. Кадрларда оның жәбірленушіні бірнеше рет ұрып, ауыр физикалық қысым көрсеткені көрінеді. Мүмкіндігі шектеулі жігіт қарсылық танытқанымен, өзін қорғай алмаған.

Құзырлы органдар оқиғаның барлық мән-жайын анықтап жатыр. Сонымен қатар, күдіктінің әрекетінде өзге де заңсыз жайттардың бар-жоғы, соның ішінде зорлық-зомбылықтың басқа түрлері болуы мүмкін бе деген сұрақтар да тексеріліп жатқаны айтылды. Алайда бұл ақпарат әзірге ресми түрде расталған жоқ.

Полиция өкілдері оқиғаға байланысты жан-жақты тергеу амалдары жүріп жатқанын мәлімдеді.

Айта кетейік, бұған дейін Қарағанды облысында да мүмкіндігі шектеулі азаматты қайыр сұрауға мәжбүрлеген резонансты жағдай қоғамда үлкен талқы тудырған еді. Ол оқиғада қол-аяғы жоқ адамның бірнеше жыл бойы көшеде қайыр сұрап жүргені, ал жиналған қаражатты белгілі бір адамның алып отырғаны айтылған. Кейін оның шын мәнінде бақылауда болғаны сот процесі кезінде анықталған.