Астанада 19 мамыр мен 30 қыркүйек аралығында әлемге әйгілі суретші әрі өнертапқыш Леонардо да Винчиге арналған халықаралық көрме өтеді, ,-деп хабарлайды «Dalamedia» ақпараттық порталы.

Көрме елордадағы Бейбітшілік және келісім сарайында ұйымдастырылады. Мұнда Рим мен Флоренция музейлерінен жеткізілген Леонардо да Винчидің әйгілі Винчи кодекстеріндегі жазбалар мен сызбалар негізінде жасалған 40-тан астам толық көлемді механизм қойылады.

Экспозицияда ұшу құрылғылары, инженерлік жобалар, әскери техникалар және өз дәуірінен озық туған түрлі құрылғылар ұсынылады. Кейін бұл өнертабыстар заманауи технологиялардың дамуына негіз болған.

Көрме шамамен 3 мың шаршы метр аумақты алып жатыр. Кеңістік ауа, су, жер және от тақырыптарына бөлінген. Осы арқылы келушілер Леонардоның табиғат құбылыстары, қозғалыс, адам денесінің құрылысы мен механика заңдылықтарын қалай зерттегенін жақынырақ тани алады.

Сондай-ақ көрмеде суретшінің ең танымал туындыларының көшірмелері де қойылады. Жоба заманауи форматта безендірілген: LED-туннельдер, цифрлық проекциялар мен голографиялық инсталляциялар келушілерге Леонардо идеяларын көрнекі түрде таныстырады.

Халықаралық көрме Қазақстан Республикасы Мәдениет және ақпарат министрлігі мен Астана қаласы әкімдігінің қолдауымен ұйымдастырылып отыр. Жобаны «Астана Концерт» компаниясы жүзеге асырады.

Көрме күн сайын сағат 10:00-ден 20:00-ге дейін үзіліссіз жұмыс істейді. Мекенжайы: Астана қаласы, Тәуелсіздік даңғылы, 57, Бейбітшілік және келісім сарайы.