2026 жылғы 29 шілде – 9 тамыз аралығында Астана «Болашақ ойындары 2026» (GOTF 2026) халықаралық фиджитал-турнирін өткізеді. Жарысқа 50 елден 900-ден астам спортшы қатысады, жалпы жүлде қоры 4 млн АҚШ долларынан асады деп хабарлайды «Dalamedia» ақпараттық порталы.

12 күндік додада 8 фиджитал-дисциплина өтеді, оның ішінде фиджитал-футбол, баскетбол, шутерлер, жекпе-жек, би, сондай-ақ MOBA Mobile, MOBA PC (Dota 2) және Battle Royale бар.

Dota 2 жарыстары 31 шілде – 5 тамыз аралығында Жақсылық Үшкемпіров атындағы жекпе-жек сарайында өтеді. Жүлде қоры – 1 млн доллар.

Турнир «Барыс Арена», Beeline Arena, Qazaqstan жеңіл атлетика кешені және жекпе-жек сарайы сияқты негізгі спорт нысандарында ұйымдастырылады. Шараға 100 мыңнан астам көрермен келуі күтіледі.

Алдыңғы GOTF 2025 турнирі 461 млн қаралым жинап, фиджитал-спорттың әлемдік деңгейде қарқынды дамып келе жатқанын көрсетті.

Қазақстан бұл турнир арқылы цифрлық және дәстүрлі спортты біріктірген жаңа спорт форматын дамытуда өз орнын нығайтпақ.