Қазақстанда бақбақ жұлғаны үшін ірі көлемде айыппұл қарастырылғаны әлеуметтік желіде қызу талқыланып жатыр, — деп хабарлайды «Dalamedia » ақпараттық порталы.

Белгілі болғандай, елде Виталий бақбағы мен көк-сағыз бақбағын жұлуға, жинауға немесе зақымдауға заңмен тыйым салынған. Мұндай талапты бұзғандарға 3000 айлық есептік көрсеткіш көлемінде, яғни шамамен 12,9 миллион теңге айыппұл салынуы мүмкін.

Мамандардың айтуынша, бұл өсімдіктердің кейбір түрлері Қазақстанның Қызыл кітабына енгізілген. Әсіресе көк-сағыз бақбағы өте сирек кездеседі. Оның тамырынан табиғи каучук алынатындықтан, ғылыми әрі өндірістік маңызы жоғары. Сондықтан бұл өсімдіктер мемлекет қорғауына алынған.

Қолданыстағы заңнамаға сәйкес, сирек кездесетін өсімдіктерді жұлуға, жоюға, сақтауға, тасымалдауға немесе сатуға қатаң тыйым салынған. Мұндай құқықбұзушылық үшін айыппұлдан бөлек, түзеу жұмыстары, бас бостандығын шектеу немесе үш жылға дейін бас бостандығынан айыру жазасы да қарастырылған.

Алайда көпшілік сирек кездесетін бақбақты кәдімгі дала гүлінен ажырату қиын екенін айтып отыр. Сыртқы келбеті ұқсас болғандықтан, азаматтар байқаусызда заң бұзып қоюы мүмкін деген алаңдаушылық бар.

Айта кетейік, Қазақстанда тек бақбақ емес, басқа да өсімдіктерді жұлуға шектеу қойылған. Қызыл кітапқа 387 өсімдік түрі енгізілген. Олардың қатарында меруертгүл, бұйра лалагүл, цитвар жусан, қазақстандық қоға және Грейг, Кауфман, Шренк, Регель сынды қызғалдақтың бірнеше түрі бар.